احتفل الإعلامي إبراهيم فايق، بعيد ميلاده، برسالة مطولة عبر حسابه الشخصي على موقع التواصل الإجتماعي فيسبوك.
وكتب إبراهيم فايق، الآتي:” حتى إذا بَلَغَ أشدّه وبلغ أربعين سنة قال رب أوزعني أن أشكر نعمتك التي أنعمت علي وعلى والدي وأن أعمل صالحا ترضاه وأصلح لي في ذريتي إني تبت إليك وإني من المسلمين.. صدق الله العظيم.. اللهم لك الحمد والشكر.. ٤٠ سنة”.
وواصل :” مرحلة جديدة في عمري.. عداد جديد بيشوف أرقام ناحية الشمال كلها ٤ .. أرقام بتطالبني اني أحاسب نفسي وأراقبها علشان أبقى أفضل نسخة من نفسي.. وعلشان مفيش أعذار.. ده سن النضج والهدوء واكتمال الشخصية.”.
وأضاف:” فضل ربنا عليا عظيم.. كرمني بعطفه وشملني برحمته.. لمست السما بايدي في لحظات من الفرحة واتهبدت على الأرض واتكسر خاطري في لحظات من الحزن.. رضيت بكل مراحل حياتي وسلمت أمري لله وتركت له التدبير وشغلت نفسي بمهمة السعي فقط فكانت النتائج أعظم بكتير من أحلامي.”.
وتابع :” 40 سنة.. ولسه الشغف جوايا للنجاح بنفس طاقة العيل اللي لسه بيحلم يحقق ذاته.. ٤٠ سنة ولسه بعافر وهعافر علشان أتعلم أكتر وأفهم أكتر.. ٤٠ سنة ولسه عايز أشتغل زيادة على عيوبي.. واشتغل أكتر على نفسي.”.
وشدد :” 40 سنة.. مش هنكر خضتي من الرقم.. أنا كنت بشوفهم زمان ناس كبيرة بس الدور جه عليا فجأة وأنا لسه ماسك في ايدي دراع الأتاري.. جايز اللي فات مش قد اللي جاي.. بس السيرة أطول من اللي فات واللي جاي بإذن الله”.
