أحمد موسى يهنئ سارة سمير على فضية أولمبياد باريس في رفع الأثقال: تستحق التحية

هنأ الإعلامي أحمد موسى الرباعة سارة سمير على فوزها بالميدالية الفضية في رفع الأثقال وزن 81 كيلو في أولمبياد باريس 2024 بمجموع 268.

وأضاف أحمد موسى، خلال تقديم برنامج «على مسئوليتي»، عبر قناة «NNi مصر»، قائلًا: «كان عندنا أمل أننا نحقق ميداليات في عدة ألعاب وقدر الله ما شاء فعل، ولكن مبروك لسارة سمير شكرا ليكي سارة، دي بنت مصر البطلة، تكلموا عن سارة واكتبوا عنها، سارة هي من تستحق التحية، سارة تجاوزت كل التحديات».

وتابع: «سارة بتعيط النهاردة علشان خسرت الذهبية، عينها على هدف عاوزه توصل ليه ونجحت في الفوز بالميدالية الفضية ورفعت علم مصر في أولمبياد، مبروك يا سارة، عندك فرصة تحققي الذهب في أولمبياد لوس أنجلوس، تجربة سارة مشابهة لتجربة كرم جبر في التحديات والصعاب اللي واجهتهم ورغم ذلك رفعوا علم مصر في الأولمبياد».

وشدد أحمد موسى على أهمية تقديم الدعم للاعب والاتحاد الناجح الذي رفع علم مصر في المحافل الدولية، مردفًا: «في رؤساء اتحادات فشلوا ولم ينجحوا في تحقيق ميدالية صفيح، راحوا زي ما جه، تعالوا نشوف التجربة الصينية في بعض الألعاب الأولمبية، وتحتل الترتيب في حصد الميداليات الذهبية».

وأكمل أحمد موسى: «كفاية طبطبة وكل الاتحادات اللي فشلت في تحقيق الفوز وحصد الميداليات لازم تتحاسب، كفاية ونشوف اللي عاوز ينجح ونساعده».